كيف اجعل شخص يحبني

[zoulfa]

أحب أكتب لكم عن تجربة تعلمت منها درس.. أرجو انكم تنتبهون وتتعلمون من تجربتي في عدم اللجوء لغير الله في أي شيء بما فيه الاستشفاء من الأمراض الروحانية.
قصتي طويلة بس بحاول قدر المستطاع اختصار الأحداث والتفاصيل.
احنا عايلة كبيرة ومن زمان لأن حياتنا كلها مشاكل وتوتر وتفكك أسري وكثير إشارات تدل على اننا نعاني من حسد وأعمال سحر قديمة حسب كلام شيوخ ورقاة ثقة.. ولكننا مع الأسف تركنا العلاج مع الرقاة الشرعيين وطرقنا باب السحرة طمعاً في علاج أسرع.
وأنا بالذات أكثر واحدة تعاملت مع هؤلاء الدجالين وتعلقت بهم حتى تعرضت للنصب والاحتيال أكثر من مرة بسبب أساليبهم وطريقتهم العجيبة في الإقناع وادعائهم انهم يعالجون بمساعدة ملوك من الجن المسلمين المتمكنين وليسوا كباقي السحرة وغيرها من الأكاذيب!..
أول شخص تعاملت معاه عرفته عن طريق النت من 3 سنوات كان من مكة (نسيت اسمه مع الأسف) وأخذ مني ألف ريال وعطاني أدوية غريبة عبارة عن أعشاب ما أعرف حقيقتها ومع الاتصالات طلب مني هذا الساحر اني اروح له للمكان اللي يقيم فيه مؤقتاً في المنطقة عشان يعالجني انا وأهلي من جلسة واحدة ولكن طبعاً ما رحت وانا مو غبية عشان اسوي كذا! ومع إصراره شعرت بسوء نواياه فقطعت اتصالي فيه.
ثاني شخص تعاملت معه بعد الأول بعدة أشهر، كان من نفس المنطقة الشرقية من حفر الباطن وعرفته أيضاً عن طريق النت (أيضاً نسيت اسمه) وما طلب مني إلا مبلغ بسيط (500 ريال) بس كان يتمادى معاي في الكلام ويطلب أشياء غير منطقية وغير مريحة، ومرة علمت صديقة لي عنه لأنها عندها مشكلة فكلمته وقال لها كلام ما يدخل المخ ولما نفرت منه خلاها تحلم حلم مخيف واتصلت فيني مفزوعة وتقول حلمت كذا وكذا وانا مدري قلت لها يمكن اضغاث احلام!؟ بس بعدها كلمني وقال لي انه خلاها تحلم كذا عشان تكلمه وتتعامل معاه ومن ذيك المكالمة حسيته خبيث. ثم جات المكالمة الحاسمة اللي قطعت بعدها صلتي فيه نهائياً؛ بعد ما طلب طلب صدمني وهو اني أرسل له صورتي وانا عارية عشان يتمكن الجن اللي يساعدونه من تحديد مكان الأذى في جسمي! ولما رفضت صار يحاول إقناعي بكلام تافه وغير معقول ان الأذى من الممكن انه ينتقل إلى جسم أمي إذا رفضت التعاون معاه مستغل عاطفتي لأمي وخوفي عليها وطبعاً ما تجاوبت مع هذا الهراء وقطعت اتصالي على الفور.
بعده بفترة بسيطة عرفت واحدة محتالة الله يسامح الشخص اللي دلني عليها ومدح لي فيها مدح مو طبيعي لين تصورت انها ملاك يمشي على الأرض وبيدها بركة وشفاء مؤكد!..أستغفر الله العظيم وأتوب إليه. المرأة هذي مقيمة في حي الناصرية بالدمام اسمها (أم صالح) سمراء البشرة وغير متزوجة مقيمة مع أهلها وعمرها في الأربعينات. كل ما رحت لها ألقى ناس داخلين وطالعين من بيتهم الصغير المتواضع. أول مرة رحت لها مع أمي ومسكت يدي وطالعت وقالت فيك وفيك وفيك وراح يصير لك كذا وكذا وقالت انتو فيكم وفيكم وعلاجكم كذا وكذا. في البداية عطتنا شي نرشه في البيت وبعدين عطتنا أحجبة ندفنها في البيت..يا رب تسامحنا!! دفنتها أنا وأمي في حديقة بيتنا وفي العميق بحيث صعب أحد يطلعها! كل هذا لأنها أقنعتنا انها هي اللي قادرة تخلصنا من كل اللي فينا. وفي كل زيارة لها تقول نفس الكلام ولأن امي تبي الخلاص والراحة وتبي تعالج الكل في بيتنا طلبت منها علاج لكل فرد وهي لأنها استغلالية وجشعة خذت على كل واحد مبلغ كبير وأمي ما ترددت انها تدفع وكانت توها وارثة مبلغ من عمتها الله يرحمها، وخذت المبلغ كله وعطته اياها وقالت مو مهم الفلوس أهم شي نرتاح... النصابة بعد ما خذت اللي تبيه وشبعت فلوس صارت تتهرب منا وما تستقبلنا وكل ما رحت لها يصرفوني يقولون مو موجودة! بعدها صرت أتصل فيها وما ترد أو تقفل جوالها ومرة رحت وصدتها بالصدفة وانقلب وجهها لما شافتني بس صرفتني وقالت انا بطلع وتعالي لي بعدين. ولما أدركت انها نصبت علي اتصلت بهيئة الأمر بالمعروف والنهي عن المنكر وبلغت عنها، وكنت متأكدة انها نصبت علينا خصوصاً بعد ما زادت المشاكل في بيتنا وحسيت انها هي وأحجبتها اللي دفنتها ورا هالمصايب اللي تتحذف علينا وصرنا نسمع أصوات وطقطقه أكثر في بيتنا فطلبوا مني رجال الهيئة اني أتعاون معاهم وأروح لها البيت ويصيدونها متلبسة بس ما قدرت لأنها تصرفني وطلبت منهم يستعينون بواحدة ثانية.. ضحية جديدة يعني،، وسمعت بعدها انهم مسكوها وانسجنت بس ما تأكدت من الخبر بس أتمنى انه صحيح لأنها داهية وحقيرة. وسبحان الله؛ الشخص اللي دلني عليها وكان يمدح فيها تضرر منها مثلنا!
الدجال الآخر عرفته بعد النصابة مباشرة وهو يمني حاط رقمه وإيميله في النت وكاتب أنه يعالج لوجه الله جميع الحالات ولا يريد سوى الأجر من الله.. استغربت وقلت معقول الدنيا مازالت بخير! فـ أضفته على المسنجر ورد علي المساعد حقه وقال لي اني لازم أتصل عشان يعرف ايش فيني ويشخص حالتي. اتصلت فيه هاتفياً وصار بيننا مكالمات وقدر انه يأثر فيني وهو يخبرني أدق التفاصيل عن شخصيتي وحياتي وجاب لي معلومات محد يدري عنها وحتى الأفكار اللي تدور في راسي قالها! وكلام أذهلني وخلاني أصدق انه فاهم ويعرف كل شي!! وما كنت أدري ذيك الفترة بأن هالنصابين يبهرون الواحد بمعلومات ياخذونها من القرين حقه! يعني ما جابوا شي جديد! بس انا ما كنت أدري وكنت على نياتي.
وصار يقنعني بأن فيني وفيني وفيني وفي أهلي وأثار كلامه القلق والخوف فيني وحسيت اني مستعدة اسوي أي شي للخلاص من البلاوي اللي قال عنها ووعدني ان الخلاص منها على يده هو وطلب مني مبلغ 500 ريال في البداية وبعد ما حولت له المبلغ بفترة طلب مبلغ آخر أكثر شوي وفي كل مرة يطلب مبلغ ويدعي انه اكتشف شي جديد وانه عشان نستفيد ويمشي العلاج مثل ما نبي لازم بالاول نفك أعمال وعقد قديمة وغيره من الكلام الفارغ وطبعاً كنت أصدق لأني كنت ساذجة فيما يتعلق بهالدجالين خصوصاً ان طريقة الواحد منهم في الكلام مقنعة جداً واحتمال كبير انهم يستخدمون السحر لإقناع الشخص والتأثير عليه لتحويل المال. وكان هالشخص مثل غيره من المشعوذين النصابين يصر على ان المال مو له هو للجن اللي يشتغلون له على فك الأعمال والعلاج، ومرة طلب مني اني أذبح لهم فقلت لا لأنه شرك الذبح لغير الله فأقنعني بطريقة عجيبة انه مو حرام وأستغفر الله العظيم وأتوب إليه من ذلك الذنب العظيم يوم اقتنعت وأرسلت له المبلغ عشان يذبح وأظن انه ما ذبح ولا شي وحط الفلوس في جيبه فهو أكيد انه يعرف اني ماقدر أذبح أو أكلف أحد بالذبح فطلب المال عشان يوهمني انه بيذبح لهم!
واستمر في طلب المال كل فترة والثانية وما كنت ألاحظ أو أحس بأي تغيير وكنت لما أسأله يقول باقي أعمال قديمة لازم نفكها أول وصعب فكها بسهولة وبسرعة لأنه مر عليها وقت طويل ومن هالكلام! وبعد ما حسيت انه نصاب ما صرت أرد على اتصالاته (طبعاً ما يتصلون هالأشكال دايماً يعطون رنة) ولما حس هو اني كشفته صار يلاحقني بالمسجات ان فيني وفيني ولحقي على نفسك لأنك لو ما سويتي كذا راح يصير كذا وكذا فأرسلت له مسج فيه كلام بما معنى اني كشفته و روح العب على غيري ومن هالكلام وتحسبت عليه ولما ما عجبه كلامي مدري وش أرسل لي نسيت بالضبط وش كان كاتب لي فرديت عليه اني بنشر رقمه واسمه في الإنترنت واكتب انه نصاب -وفعلاً ليتني سويت كذا بس لهيت مع همومي ومشاغل الحياة!- فرد علي وكتب انه هو اللي راح يفضحني لأنه عنده كل أسراري ورقمي واسمي وأسماء أهلي فطنشت ولا رديت عليه.... بس كان نذل وأحقر واحد تعاملت معاه.
نجي للي بعده..
محتالة ثانية اسمها (أم متعب)، سمراء البشرة، من سكان الدمام، مطلقة وعندها أبناء وفي نهاية الأربعينات من عمرها تقريباً. تتظاهر انها مراة مسكينة وطيبة وتتعب وتشتغل بضمير عشان شفاء الآخرين. دلتنا عليها قريبة عن طريق ناس أقنعوها انها تتعامل معاها لأن عندها قدرة على شفاء كل الحالات على قولتهم وقريبتي هذي صابها عقم مؤقت بعد أول إنجاب وقعدت سنين ما تقدر تحمل.
في الفترة اللي كانت تتعالج عندها قريبتي تعرفنا عليها ودخلناها بيتنا.
طريقتها في العلاج شعبية قديمة بس هي على قولتها فيها جن مسلم يساعدونها.. الكذبة المعتادة!
تسوي مساج كامل للجسم عشان تعرف الشخص وش علته.. بالزيت حقها طبعاً. بعدها تشرّب الشخص من خلطة هي تسويها وتحميها عالنار ومن البخار حقها تبخره فيه وخرابيط اتعب وانا أوصفها! الجلسة أكثر من يوم أعتقد 3 أيام ورا بعض والمبلغ 1500 للشخص الواحد.
جربنا طريقتها أنا وأمي وواحد من اخواني وجيت بقنع أختي الكبيرة بس رفضت لأنها إنسانة فاهمة ما شاء الله عليها مو مثلنا احنا نصدق أي شي! واختي اللي أصغر مني شافتها بس ما ارتاحت لها وكرهتها من أول نظرة وقالت وجهها مو مريح ومبين انها لئيمة وكذابة من عيونها وانتو كيف تقص عليكم هذي وكيف تدخلون هالاشكال بيتنا!! وعصبت علينا اننا على تواصل معاها ومصدقينها. بعدها سبحان الله بنفس الليلة اختي هذي اللي انتقدتنا وتكلمت عليها حلمت ان المراة هذي تطق باب غرفتها ولما فتحت لها اختي الباب هجمت عليها واختي هربت وقامت تلاحقها في البيت وتقول اختي ان وجهها كان مخيف في الحلم وتقول لها "انا تقولين عني كذا"؟؟ وكان الحلم كأنه حقيقة ومن يومها اختي حقدت عليها أكثرت وصارت تحاول فينا نقطع اتصالنا فيها وهددت انها بتطردها من البيت اذا جات مرة ثانية بس ما كنا نسمع منها وأمي كانت تقول انتي أكيد فيك بلا يمنعك انك تقابلينها ويبي يخرب علينا العلاج!
بعد ما لهطت الفلوس وما شفنا نتيجة وقفنا عن التعامل معاها خصوصاً بعد ما سمعنا عن مشاكل تتعلق فيها وانها مشتبه فيها ومطلوبة من المباحث.
النصاب التالي عرفته عن طريق الدجالة اللي اسمها (أم متعب). النصاب هذا خطير للغااية وأتعب وانا اقول خطير ولعين. كلمته في الفترة اللي كنا نتعامل فيها مع المدعوة (أم متعب) لما طلبت منها تساعدني في حاجة وقالت ان فيه واحد أحسن منها في الشغله هذي وعطتني اسمه ورقمه ومدحت لي فيه مدح مو طبيعي!
نسيت اسمه مع الأسف بس كان رقمه بحريني.
كنت ذيك الفترة أعاني من مشكلة خطيرة.. شخص غالي ويعز علي انسحر بسحر أسود وبنجاسة والشخص هذا يهمني جداً جداً لدرجة اني كنت أبكي وما أنام الليل علشانه.
النصاب هذا طلب مني مبلغ 80 ألف ريال عشان يفك العمل اللي فيه وينقذ حياته وقال ان المطلوب مبلغ أكبر من كذا بس هو بيبيع سيارته عشان يدبر لي المبلغ الباقي واذا توفر عندي فلوس بعدين أرجع له فلوسه! شوفو النصب والدهاء كيف! طبعاً كلام ما يدخل العقل بس مدري كيف صدقت! هذا غير انه غسل مخي بكلام أكثر وأبدى تعاطف شديد معاي خلاني أصدق انه طيب ويبي لي الخير ويبي يساعد من قلب.
ولأن 80 ألف مبلغ كبير بالنسبة لي وفوق طاقتي قلت له يشوف حل ثاني قال ما في غير هالحل وهذا المبلغ مو له للجن اللي معاه والأغراض اللي بيشتريها حق فك السحر والسحر اللي فيه قوي مرة وغيره من الكلام اللي قنعني فيه وخوفني أكثر لما قال انه بيموت لو ما لحقت عليه ودبرت المبلغ بأسرع وقت وكان يلعب في اعصابي يومياً يقول لي فلان قرب يموت وبسرعة دبري المبلغ ومن هالكلام وكنت أتعذب كل يوم ومو عارفه شسوي!؟ وكان يضغط علي عشان آخذ قرض من البنك. ترددت في البداية واستخرت.. وسبحان الله كل ما جيت باخذ قرض يتعسر الموضوع! إما من جهة العمل أو من البنك نفسه! في البداية تعسرت عملية الحصول على خطاب تعريف بالراتب من شغلي ويوم استلمته أخيراً بدت الصعوبات من البنك! كان ربي يعطيني إشارات ان الموضوع غلط وفيه شر لي بس انا كنت مصرة آخذ القرض عشان أنقذ حياة الشخص العزيز علي قبل فوات الأوان مثل ما أوهمني.. وسبحان الله خلال هالفترة اللي كنت أحاول فيها مع البنك وما رضى البنك وكل ما اتصلت ببنك ثاني يقولون احنا ما نتعامل مع جهة عملكم ولما لقيت بنك بيمولني أخيراً سبحان الله شفى المسحور وتلقيت الخبر السعيد وأرسلت حق النصاب ابي ابشره أفكره بيفرح لي لأنه مسوي فيها مهتم فيني وخايف عليه وانه مثل اخوه لدرجة انه بيبيع سيارته عشانه! لما وصل له مسج مني ان الشخص المسحور انفك عمله ورجع لحالته الطبيعية انجن النصاب وصار يرسل لي مسجات ويقول تأكدي ترى السحر اللي فيه خطير وأكيد بيرجع وبعدها أرسل لي مسج قال تراه ما طاب ولا شفى نهائياً وباقي فيه وحاول يقص علي، ولما كلمت الشخص اللي كان مسحور وقلت له عن السالفه بحسن نية مني شك فيه خصوصاً مع سالفة انه يبي يبيع سيارته عشانه فقال اخوي هو عشان يسوي كذا عشاني؟؟ هذا أكيد نصاب وسوى تحريات عنه بحكم علاقاته الداخلية والخارجية مع مسئولين، وتلقيت الخبر الصدمة! ان الشخص هذا مطلوب أمنياً في قضايا نصب واحتيال وانه دايم يغير أرقامه عشان محد يقدر يصيده! سبق ونصب على ناس وخذ منهم مبالغ كبيرة وللحين مازال حر طليق في البحرين!
هو ادعى انه سعودي الأصل وادعي انه من قبيلة معينة من الجنوب واستغربت لأن لهجته معاي ما كانت سعودية أبداً وكان يتكلم لهجة غريبة وسبحان الله طلع احساسي في محله انه بحريني وغير كذا طلع شيعي!! ولما درى اني دريت عنه حاول يبتزني بصور أرسلتها له للشخص اللي كنت ابي اعالجه اللي كان مسحور لأنه سبق وطلب صور لي وله والحمدلله ما أرسلت له صور لي مع اني كنت واثقة فيه ثقة عمياء ذيك الفترة بس سبحان الله ربي ستر وشي منعني من الله اني أرسل له صورة لي واكتفيت بإرسال صور للشخص اللي كنت ابيه يعالجه بس الحمدلله بعد الصور اللي أرسلتها ما فيها وجهه.. شلت وجهه منها كأني حاسه! وطلب 200 ألف ريال والا بينشر الصور وبينشر معاها المعلومات اللي يعرفها عن صاحب الصورة وعني وهدد انه بيكلم اخوي وبيعلمه عن كل الأسرار اللي عطيتها اياه بس انا طنشت لأني متأكدة انه ما عنده رقم اخوي مثل ما يدعي وما كان عندي شي أخاف منه.
المصيبة الأخرى انه مو هو اللي كان يكلمني! كان له أعوان يكلموني على انهم هو! وأصواتهم متشابهة.. يعني عصابة!
وهذا اللي يفسر اني كنت ألقاه أي وقت أتصل فيه صبح وليل!
النصاب اللي بعده.. لبناني اسمه (أبو محمد) قابلته في بيروت بعد ما دلتني عليه صديقة لبنانية هناك. طبعاً انا رفضت في البداية اني الجأ لغير الله وقلت لها عن مشاكلي وورطاتي السابقة مع الدجالين واني قاعدة أرقي نفسي بنفسي بالقرآن فقامت تمدح فيه ومصممة تقنعني وتقول كلميه ماراح تخسرين شي وتقول انه ما ياخذ فلوس واجد بس مبالغ رمزية واذا طلب منك شي فوق طاقتك لا تتعاملين معاه.. بس مع ذلك ما كنت راضية اني اكلمه وصارت تلح علي اني اكلمه لأنها تبي مصلحتي واني منحوسة ومن هالكلام وانها جربته وقاعدة تتعالج وتحس انها في تحسن (أتوقع هي كانت تتوهم!)
قلت لازم استأذن من أمي قبل كل شي وبعد ما قلت لها كلام صديقتي اللبنانية ولأن أمي تثق في صديقتي هذي قالت طيب بس خلوه هو يجي للفندق انتو لا تروحون له. وكلمته صديقتي واتفقت معاه يجي للفندق اللي احنا ساكنين فيه وكان الموعد في ساعة متأخرة من الليل.
وفي الموعد المحدد تقابلنا في اللوبي وكنا قاعدين معاه انا وصديقتي اللبنانية وأختي اللي أصغر مني.. بهرني بكلامه.. قال أشياء كثير عني، حتى لون غرفتي في السعودية قاله وكيف شكل بيتنا ووصف بعض الزوايا منه! وسأل عن أمي وكانت نايمة وفجأة نزلت أمي وهي تعبانة ومبين على وجهها كنها قلقة أو فيها شي واستغربنا انها توها نامت ووش مصحيها فجأة وهالوقت!؟ فقالت ان صحاها حلم مزعج عني وكان كابوس مخيف فزعها من نومها وخافت علي فطلعت عشان تدور علي فقال لها الساحر اللبناني انه هو اللي خلاها تحلم كذا عشان يصحيها وتجي تقعد معانا.
المهم الخبيث هذا أبهرنا كلنا بكلامه وطالت الجلسة لقريب الفجر لأن عجبتنا سوالفه.. *** مخنا! ماعدا أختي اللي أصغر مني كانت تطالع فيه باستهزاء ولما قلت له عن مشكلتي ان شعري متغير مو مثل قبل واني متأكدة اني محسودة عليه قال لي انا أقدر أعالجه وأرجعه لك زي ما كان.. ابتسمت اختي وبعدها قالت لي على جنب: "لو يقدر صحيح كان رجع شعره وعالج هالشعر المنتف!" (هو مقرع وشعره مأساة!)
المهم؛ طلب مقدم عشان يبدا يشتغل لنا وعطيته 100 دولار وقال أول ما توصلون السعودية كلموني عشان ابدا اشتغل لكم.
وبعد ما وصلنا بكم يوم كلمته وطلب مني أحول له مبلغ ألف دولار عشان يشتغل لي واذا ابيه يعالج أي احد من أهلي ندفع له عن كل واحد نفس الشي ألف ريال.. وصار المجموع مبلغ كبير فما قدرت مع ان أمي أصرت لأنه أثر فيها كثير بكلامه ذيك الليلة بس قلت لها خلينا نجرب شغله فيني وبعدين اذا انحلت مشاكلي وشفت منه فايدة نستمر في التعامل معاه.
وكنت أعاني ذيك الفترة من مشكلة كبيرة وأوهمني انها مستحيل تنحل وأثار القلق فيني عشان يزيد من تعلقي فيه وان العلاج بيده هو وبس وان النصابين اللي تعاملت معاهم من قبل هم سبب البلاوي اللي انا فيها بزيادة النحس في حياتي وغيره من الكلام. في البداية طلب مني 2800 دولار وقلت له سوري ما معاي هالمبلغ قال اذا تبين مشكلتك تنحل وترتاحين دبري المبلغ وهذا مو لي هذا للي يشتغلون لي وترى اللي فيك صعب ينفك ومفروض آخذ مبلغ أكبر من كذا بس لأنك من طرف فلانة انا راعيتك وغيره من الكلام اللي ضغط فيه علي.
وكان في رصيدي مبلغ محتاجته بس حولته له لأن مشكلتي كانت شاغلتني ذيك الفترة بقوة ومتعبتني وكنت ابي ارتاح من الهم. قلت لصديقتي اللبنانية كم ياخذ منك؟ قالت عمره ما طلب مني مبلغ كبير تقريباً 100 دولار بالكثير! استغربت قلت اشمعنى انا؟ هل لأني سعودية قال خلاص هذي غنية ومفكرين كل السعوديين بطرانين ومرتاحين!؟ قالت كلميه وقولي له ان ما عندك قلت لها اني قلت له وانه مفروض يعرف من نفسه اني مو غنية وان هذا المبلغ اللي حولته له انا محتاجة له. قالت لي ليش تحولين له حتى ولو! وتضايقت هي.. قلت لها انه مصر ما يشتغل إلا بهالمبلغ وانا بشوف آخرتها معاه.
بعدها بفترة تقريباً شهر طلب مني 150 دولار قلت له والـ2800 دولار اللي حولتهم لك قبل؟ قال طرأ شي جديد واحتجت بخور وشغلات أكثر واضطريت اتسلف من صاحب المحل وشريتهم عالحساب وحرام لازم أرجعهم له. ما اقتنعت بالكلام وقلت له ما أقدر وما عندي! بس أصر وضغط علي بكلام جديد فاضطريت أحول له. طبعاً كان علي ديون وكان مفروض أسددها من المبلغ اللي كان في رصيدي بس حولت له كل فلوسي عشان أحل مشكلتي أولاً على اني أدبر فلوس لاحقاً حق المستحقات والديون اللي علي.
ومن هنا بدت مشكلتي وأزمتي المالية اللي مازلت أعاني منها لهذا اليوم كأنه عقاب من ربي!
تراكمت الديون علي لأن منها مستحقات فيزا وكانت تزيد وتتضاعف كل شهر وكان الحقير كل ما كلمته يقول لي ان الشغل يبي له وقت وكان يوعدني يقول صبري وبتشوفين النحس راح من حياتك نهائياً وكل شي تبينه راح يتحقق وكانت كل مكالمة تنتهي بغسيل مخ معتبر! وكان يطلب مني أسوي شغلات غريبة مثل اني اولع شموع في غرفتي واكتب كلام والظاهر كانت طقوس لاستحضار الشياطين حقته وكنت اسوي أعمال شريرة واجيب الضرر لنفسي وانا مدري! لأنه كان يوهمني انها فيها فايدة لي وتسرع بالعلاج.
بعدها بديت أسمع طقطقه بغرفتي ودايماً الطقطقه هذي من زاوية معينة بالغرفة وكنت احس ان أحد معاي بس كنت أطنش.. ويبدو ان الشياطين سكنت معاي بغرفتي وصرت مراقبة منه ومن غيره من كثر السحرة اللي تعاملت معاهم صارت عيون الجن حقينهم علي على مدار الساعة. كل ما دخلت غرفتي أسمع أصوات كأنهم يستقبلوني! وكل ما غيرت ملابسي ومشيت عارية في غرفتي سمعت طقة قوية كأنهم يقولون احنا هنا وقاعدين نشوفك! وكل ما طالعت التلفزيون وكان فلم رعب أو برنامج فيه شي عن جن يحسسوني انهم موجودين بأصوات فجأة وأكثر مسلسل كان يثير جنونهم:
Ghost Whisperer
كل ما أشوفه لازم اسمع شي أو يصير شي بالغرفة.. يطيح شي.. يتحرك شي.. وغيره.
وما شفت نتيجة من هالنصاب غير كلام في الهوا.. كل ما كلمته وقلت له وين اللي قلت عنه يقول قريب بس اصبري. كان يلعب علي لين نفذ صبري وحسيت انه كذاب فوقفت عن الاتصال فيه.
بذيك الفترة بديت أقرأ قرآن واعالج نفسي بسورة البقرة كل يوم والأذكار والأدعية وتبت وعاهدت ربي اني ما أرجع للدجالين حتى لو الواحد منهم ما ياخذ فلوس ومهما أبدوا رغبة صادقة في المساعدة ومهما ومهما.. حلفت اني ما أكلم أحد عشان ما ينغسل مخي من جديد.
واستمريت في علاج نفسي بالقرآن كم شهر وكان عندي مشاكل وظروف صعبة وكنت في ضيق ما يعلم به إلا الله وبهذي الفترة كان عندي واحدة من صديقاتي على اتصال معاي تواسيني ونفضفض لبعض.
وفي يوم من الأيام عرضت علي صديقتي هذي اني أكلم واحد ثقة تقول انه شيخ يعالج بالرقية الشرعية.. قلت لها انا تعبت من النصابين وقررت أعتمد على نفسي وأنا قادرة اني أرقي نفسي والشفاء بيد الله وحده ما يحتاج أحط وسيط بيني وبين ربي، قالت أكيد بس هذا بيساعدك وقامت تمدح فيه مدح! وتقول هذا من طرف مديري في العمل، مديري قعد فترة عازب رغم ان فيه مميزات بس كل ما خطب ما يصير نصيب وفي الأخير اكتشف انه مسحور وبعد ما تعالج عند هذا الشخص طاب وتم موضوعه والحين زوجته حامل بتوأم! وتقول عالج واحدة ثانية من أهل مديرها فيها مس قوي ومسكونة لدرجة انهم يتكلمون على لسانها وقالت انه عالج ناس كثير وانه شغله زين ومضمون وانه معروف لدرجة يطلبونه اكباريه وأمراء! 
-المدير أردني والشيخ المزعوم من نفس جنسيته-
وألحت علي مع اني رافضة وقالت جربي ماراح تخسرين شي خصوصاً انه ما ياخذ فلوس.. قلت لها معقول؟ في أحد الحين ما ياخذ فلوس!؟ وفيه شي بدون مقابل!؟ قالت: فلان (مديرها) قال لي كذا وقال لي اذا طلب منها فلوس خل تقول لي!
قلت لها معقول!؟ قالت جربي.. قلت طيب اشوف.
نويت اكلمه بدافع الفضول بس والا انا كنت مصممة استمر على الرقية بنفسي. 
عطتني رقمه واتصلت ولقيت ترحيب شديد منه خصوصاً اني من طرف صديقه المدير. ومن أول مكالمة قال لي اللي لي واللي علي وكل شي فيني قاله وانا مستغربة ومذهولة! خصوصاً انه ما طلب اسم أمي مثل باقي المشعوذين بس طلب اسمي الأول واسم العايلة.
وبعدين عطاني واحدة مغربية أكلمها وقال لي هذي مساعدتي وقعد يمدح فيها وقال انا مشغول بجلسة علاج كلميها ووصاها علي وهي قالت لي انتي كذا وكذا وسولفت معاي وفي نهاية المكالمة قالت معليش لا تتضايقين احنا بنساعدك ومن هالكلام.
المهم طلب مني في المكالمة الثانية اني أحول له مبلغ قلت غريبة فلان قال انك ما تاخذ فلوس قال مو لي للمغربية اللي تساعدني في العلاج وهي مراة فقيرة وعندها عيال وتشتغل عشان تأكلهم.. قلت طيب انت أكيد عندك علم اني أنا متأزمة مالياً واكيد عندك علم بالنصب اللي تعرضت له، قال عارف كل شي من غير ما تقولين بس ممكن تحولين مبلغ بسيط.. قلت كم؟ قال اللي تقدرين عليه.. قلت مدري كم بالضبط؟ قال مبلغ بالدينار يعادل ألف ريال.. قلت صعبة والله ما عندي! قلت أقدر أحول 500؟ قال لا أقل شي ألف ريال سعودي وقال انه ما يبي مني فلوس وانه بيعالجني لوجه الله وعلشان خاطر فلان صديقه اللي عرفني عليه وان هذا المبلغ بيروح لمساعدته المحتاجة.. قلت طيب خير إن شاء الله.
رحت ثاني يوم حولت له المبلغ وبعدها طلب مني أقرأ سور معينة واستمر عليها يومياً. واستمريت في القراءة وكل يومين أتصل فيه وصار بيننا مكالمات للمتابعة عشان يتابع حالتي واذا فيه تطورات يبلغني.
وما شفت نتيجة بس كنت أحس براحة وتفاؤل من كلامه. وعرض علي انه يجي الشرقية عشان يشوفنا ويعالجنا وانه اذا شافنا بيكون العلاج أسرع وينتهي كل شي بنفس اليوم اللي يقابلنا فيه وحاولنا نجيبه بس تعسر الموضوع لإجراءات الفيزا وبعدها قررنا نجيبه للبحرين ونشوفه هناك بس تعسر الموضوع نفس الشي!
استمرت الاتصالات والمواظبة على القراءة 4 شهور وانقطعت عن الاتصال فيه بنهاية رمضان وجا العيد ولا كلمته أبعد لأن حالتي المادية ما كانت تسمح لي أشحن جوالي وأكلم مكالمات دولية، وجوالي الفاتورة عليه فواتير ماني ناقصه! بس كنت مستمرة عالقراءة. واتصلت فيه بعدها بعد ما تطورت المشاكل عندي بعد العيد بفترة ورد علي بأسلوب مو حلو وغريب علي.. مو أسلوبه اللي تعودت عليه.. راحت الطيبة والشهامة فجأة! قام يلمح لأجرته.. في البداية قعد يقول انا تعبت وسويت وفعلت وما شفت مقابل وأعطي الأجير حقه قبل أن يجف عرقه وغيره من الكلام.. وانا مصدومة لأنه سبق وقال لي مابي منك فلوس وانا بعالجك وبحل كل مشاكلك لوجه الله واذا انتي شفتي نتيجة وحبيتي تعطيني اوكي شي راجع لك... وين راح كلامه قبل!؟ قلت له معليش بس انا بعطيك حقك أكيد اذا شفت نتيجة بس انا ما شفت شي وانا كنت ناوية اول ما اشوف نتيجة اعطيك حتى لو ما عندي أدبر لك.. قال انتي خربتي كل شغلي وتعبي في الشهور الأخيرة! انا قلت لك لا تسوين كذا وسويتي! مع اني كنت مستأذنة منه اني اسوي حاجة وكنت خايفة تخرب على سير العلاج وأذكر انه قال لي عادي فواجهته وقلت له تذكر لما كلمتك وقلت لك بسوي كذا وهل يتعارض مع علاجي وقلت لي بلسانك عادي؟؟ قام ارتبك الظاهر مفكرني غبية أو أنسى بسرعة! المهم قام يتكلم معاي بطريقة نفرتني منه وخلتني أفقد احترامي له يقول انا طول الفترة اللي راحت أتعب عشانك وصابر واشتري البخور الغالي والعنبر لعلاجك انتي وأهلك من مصروفي ومصروف عيالي وقال كلام ما يدخل العقل! لأني ما شفت نتيجة ولما قلت له اني ما شفت نتيجة قال انه كان بيتحقق شي بس انا خربت العلاج ورجعتنا للصفر! وقال لازم نبدا العلاج من جديد.. قلت له كيف يعني؟ قام يلمح انه يبي فلوس عشان يشتغل من جديد.. قلت له كم تبي؟ قال اللي تقدرين عليه لو تحولين دفعة أولى.. وقال لازم أستعجل في العلاج قبل لا تتدهور حالتي خاصة ان اللبناني اللي تعاملتي معاه مسبقاً مازال ملخبط لك حياتك.. قال انا لازم اروح لبنان علشان اتفاهم معاه.. قلت له طيب كم تبي حدد وانا إن شاء الله بدبر لك المبلغ قال: ثلاثة آلاف دولار مثل ما حولتي للبناني قبل!
انصدمت وحسيت انه نصاب لأنه قال مثل اللبناني!.. (أنا سبق وكلمته عن اللبناني وعن المبالغ اللي خذها) وحسيته مفكرني قاعدة على بنك لأني حولت للبناني 3 آلاف دولار تقريباً مع انها كانت كل ما املك وكانت فلوسي اللي محتاجة لها وضحيت فيها ذاك الوقت على أمل الشفاء.. من جد حسيته استغلالي ويصطاد في الماء العكر فقلت له ببرود خير إن شاء الله وأنهيت المكالمة ومن بعدها ما صار بيني وبينه أي اتصال لأني حذفت رقمه من جوالي. وأخيراً أدركت ان محد يسوي شي لوجه الله في هالزمن.. اللي يقول لك بعالجك وبدون مقابل اعرفي انه كذاب ووراه شي.. إذا الرقاة الشرعيين عندنا في البلد ياخذون فلوس ورسوم عالدخول والقراءة ويبيعون الزيت والماي المقري عليه! 
بنات هذي قصتي.. رجاءً لا تجي واحدة منكم تنتقد وتكتب كلام جارح.. انا أدري اني غلطت وظلمت نفسي بس انا كنت ضايعة ويائسة– أستغفر الله العظيم وأتوب إليه- كنت مثل الغريق اللي متعلق بقشة وكلامهم كان مقنع جداً وهالنوعية عموماً خبرة في غسيل الدماغ وممكن يأثرون عالواحد بالسحر والدجل. 
انا نزلت قصتي لكم عشان تستفيدون من تجربتي لأني ابي لكم الخير.. ما ابي أحد يقص عليكم مثل ما انقص علي.. والحمدلله جات على خسارة فلوس مو شي أكبر والا غيري من الحريم مساكين وصلت فيهم درجة السذاجة وسوء الحظ انهم يروحون للمشعوذين وكم من واحدة انتهك عرضها وعانت من تداعيات لقاءها بالسحرة. وأبسط مثال هذا الخبر الـ"فريش" اللي نزل اليوم في جريدة الرياض وجريدة اليـوم.. اقروه عل وعسى تتعظون. 
أكدت أن حكم السجن والجلد غير مرض بحق من دمر حياتها

«المغتصبة» تطالب بحكم القتل على المشعوذ